Selma Lóa er fædd árið 1974 og er listunnandi orkubolti með óslökkvandi ást á menningu og listum og ferðalögum. Selma Lóa Björnsdóttir er sjálfstætt starfandi fjöllistakona með ævintýraþrá, brennandi áhuga á mannfólkinu og óslökkvandi ferðaást. Hún hefur sett upp ótal sýningar um víða veröld, sungið tvisvar í Eurovision ( lenti í öðru sæti í Ísrael 1999), samið dansa fyrir ótal söngleiki, leikið og sungið í yfir 30 leikritum og söngleikjum, verið dómari í Allir geta dansað, Idol Stjörnuleit og Ísland got talent, leikið norn í Fólkinu í blokkinni og hjólreiðagellu í Undir trénu, talsett fjöldan allan af teiknimyndum ( talaði meðal annars fyrir Ömmu krumpu í Rauðhettu og Barbei…….enginn millivegur) og leikstýrt einnig talsetningum. Hún er mikill stuðbolti og tilfinningaspaghetti og langar að gefa af sér á mikilvægum stundum í lífi fólks. Selma Lóa hefur verið athafnastjóri frá 2018 á höfuðborgarsvæðinu.

Sigurður Starr Guðjónsson er fæddur árið 1993 og er dragdrottning, framleiðandi og skemmtikraftur

Athafnastjóri frá 2022

Steinar Harðarson er fæddur 1944 og hefur verið athafnarstjóri frá 25. mars 2007. Steinar hefur verið stjórnarmaður í Siðmennt og svo gjaldkeri frá 2013-2017. Hann var í kennslunefnd athafnaþjónustu Siðmenntar 2008-2015 og svo hefur hann stjórnað fjölmörgum fermingarathöfnum á vegum félagsins. Steinar var við tæknifræðinám og störf í Svíþjóð á árunum 1969-1980. Hann var umdæmisstjóri hjá Vinnueftirlitinu í Reykjavík frá 1999. Steinar er mikill áhugamaður um félagslegt réttlæti og jafnrétti og hefur setið í stjórn og einn af stofnendum félagsins Icelandpanorama sem vinnur gegn fordómum og mismunun.

Anna Brynja er fædd árið 1979 og er ævintýralega áhugasöm um fólk og leitast við að gera athafnir sem fókusa á einstaklinga dagsins.  Hlýleiki, einlægni og húmor endurspegla Önnu Brynju og hún vílar ekki fyrir sér að fara skapandi leiðir í athöfnum ef eftir því er óskað. Anna Brynja er menntuð leikkona frá Rose Bruford College í Englandi og með kennsluréttindi í leiklist frá Listaháskóla Íslands. 

Athafnastjóri frá 2018

Íris Stefanía er fædd árið 1986 og er sviðslistakona og kúrator sem vinnur femínísk verk með áherslur á líf og líkama kvenna. Hún kennir leiklist og magadans og ýmislegt tengt unaði og vellíðan. Íris er mikið náttúrubarn og elskar ekkert meira en að kveikja bál í fjörunni og synda í köldum sjó. Íris hefur mikla trú á því góða í mannfólki og leggur sig fram við að skapa mjúkar og fallegar stundir ívafðar húmor þar sem öllum líður vel.  

Athafnastjóri frá 2022

Ragnhildur Sigurðardóttir er fædd árið 1972 og er frá Álftavatni í Staðarsveit. 

Athafnastjóri frá 2022

Markmið Tryggva er alltaf að gera persónulega og ógleymanlega athöfn, hvort sem hún fer fram í heimahúsi eða á mið-hálendinu, brúðhjón séu í kjól og hvítu, eða Star-wars búningum. Tryggvi er með Bs í líffræði með mannfræði sem aukafag, BA gráðu í sviðslistum, situr í stjórn leikstjórafélags Íslands og fer með ferðalanga ofaní hraunhella og gegnum ísgöng. Athafnastjóri frá 2015 á höfuðborgarsvæðinu en er mikil fjallageit og ferðalangur. Fæddur 1980.

Kolbeinn Tumi Daðason er fæddur árið 1982 og er byggingaverkfræðingur og fréttastjóri.

Athafnastjóri frá 2022

Sigurður er menntaður og starfar sem skipstjórnarmaður. Hann hefur verið athafnarstjóri frá 2013. Hann hefur einlægan áhuga á heimspeki, siðfræði og sögu sem og málefnum líðandi stundar. Hann fær mikla gleði, sem athafnarstjóri, út úr því að vinna með fólki og taka þátt í að skapa tímamótastundir í lífi þess.

Athafnastjóri frá 2016, verkefnastjóri athafna hjá Siðmennt frá 2022.

Katrín Oddsdóttir er fædd árið 1977 og er lífsglaður lögfræðingur með óbilandi trú á fegurð, húmor og réttlæti. Katrín Oddsdóttir er mannréttindalögfræðingur og spunaleikari. Trúir af öllu hjarta á fegurðina í lífinu og að nálgast kjarna hennar í gegnum húmor og einlægni. Katrín er með meistaragráðu í mannréttindum frá University of London, BA gráðu í lögfræði frá Háskólanum í Reykjavík og BA gráðu í fjölmiðlafræði frá Dublin City University. Hún starfaði sem lögmaður um árabil auk þess sem hún sat í Stjórnlagaráði. Hún sinnir um þessar mundir ýmsum störfum m.a. fyrir Öryrkjabandalagið og kennslu við lagadeild Háskólans í Reykjavík auk þess sem hún ferðast víða um veröld til að flytja fyrirlestra um íslenska stjórnarskrárferlið. Fékk athafnastjóraréttindi sumarið 2018 en hafði áður sinnt athöfnum fyrir vini og vandamenn.

Margrét Gauja hefur brennandi áhuga á útivist og handavinnu. Hún tók þátt í undankeppni Eurovision sem barn, hefur saumað sér peysuföt og elskar að eyða tíma með vinum sínum. Margrét Gauja er með BA próf í Uppeldis- og menntunarfræðum, master í mannauðsstjórnun og með kennsluréttindi. Einnig starfar hún sem verkefnastýra hjá Hamrinum ungmennahúsi, sem jöklaleiðsögumaður, heldur fyrirlestra og námskeið og stýrir athöfnum fyrir Siðmennt, í peysufötum.

Athafnastjóri frá 2016

Margrét Erla Maack er fædd árið 1984 og er veislustjóri, magadansmær, danskennari og skemmtikraftur.

Athafnastjóri frá 2022

Sesselía er fædd 1987 og er einlæg og forvitin um lífið og tilveruna. Sesselía Ólafsdóttir lauk leiklistar- og leikstjórnarnámi frá London árið 2012 og hefur síðan þá unnið hérlendis og erlendis sem leikkona og leikstjóri. Þá er hún annar helmingur gríndúettsins Vandræðaskáld og hefur undir þeim formerkjum unnið bæði sem veislustjóri og skemmtikraftur. Sesselía gerðist athafnastjóri árið 2018 og starfar mest á Norðurlandi og stundum fyrir sunnan.

Hilmar hefur mikinn áhuga á fjölbreytileika og fagurfræði í mannlegum samskiptum. Hann er með MA í alþjóðasamskiptum frá Háskóla Íslands, BA í arkitektúr frá Arkitektskolen Aarhus og lauk 5. stigi í klassískum píanóleik. Þá hefur hann lengi barist fyrir mannréttindum og lífshamingju hinsegin fólks, m.a. sem formaður Samtakanna '78. Hilmar spilar og syngur til heimabrúks og hefur einnig sungið með ýmsum kórum, s.s. Mótettukór Hallgrímskirkju, Raddbandafélagi Reykjavíkur og Hinsegin kórnum sem hann tók þátt í að stofna árið 2011. Hann hefur mikinn áhuga á menningu og listum og m.a. skrifað, framleitt og flutt eigin útvarpsþætti fyrir Rás 1. Hilmar stundar jóga og hugleiðslu og bregður sér í sund og jafnvel á skíði þegar færi gefst. Hann hefur unun af ferðalögum, læra ný tungumál og kynnast fólki af fjölbreyttum menningarbakgrunni. Hilmar leggur áherslu á að skapa fallegar, hlýjar og persónulegar athafnir, þar sem húmorinn er ekki langt undan. Heimavið eða úti í náttúrunni, við formlegar og óformlegar aðstæður. Athafnastjóri frá 2018 á höfuðborgarsvæðinu og nágrenni en hefur hlýjar taugar til landsins alls – ekki síst til Ísafjarðar, þar sem hann ólst upp, og Vopnafjarðar þaðan sem hann er ættaður í móðurætt. Fæddur 1976.

Erla Sigurlaug Sigurðardóttir er fædd árið 1976 og er náttúruunnandi og íþróttakona með nokkrar háskólagráður í mannfræði, friðarfræðum og stjórnun. Ferilskráin hennar er eins og regnboginn, fjölbreytnin og fjörið í henni gefur henni lífsneistann.

Athafnastjóri frá 2022

Helga Bára Bragadóttir er fædd 1974 og hefur verið athafnastjóri frá 2015. Samhliða útförum hefur hún sérhæft sig í smærri hjónavígslum og nafngjöfum s.s. í heimahúsum og undir berum himni. Helga Bára leggur áherslu á klæðskerasniðnar athafnir með hátíðlegum léttleika sem endurspegla fjölbreytileika þeirra sem til Siðmenntar leita. Helga Bára er menntuð í mannfræði, kennslu og verkefnastjórnun. Hún hefur lengst af starfað á sviði fræðslu og mannúðarmála bæði á Íslandi og erlendis og er alvön að stýra stærri sem smærri viðburðum. Helgu Báru finnst m.a. gaman að velta vöngum um siðferðileg álitamál, læra framandi tungumál og sinna sjálfboðastörfum.

Ragnar Ísleifur er fæddur árið 1977 og er leikari, leiðsögumaður og með meirapróf á rútu.

Athafnastjóri frá 2022

Zindri Freyr Ragnarsson Caine er fæddur árið 1981 og er búsettur í Vestmannaeyjum. 

Athafnastjóri frá 2022

Hugsjónir Gunnars Hersveins snúast um friðarmenningu, mannréttindi, borgaravitund, náttúruvernd og hamingju annarra og hefur hann skrifað fjölda greina um efnið og flutt erindi. Hann er heimspekingur, rithöfundur og fyrirlesari. Skrifaði m.a. bókina Gæfuspor – gildin í lífinu þar sem leitast er við að draga fram valdar dygðir, tilfinningar, fagra hugsun og skyn á tímann. Athafnastjóri frá 2015 á höfuðborgarsvæðinu og í nágrannasveitarfélögum.

Giftingar og nafngjafir eru einhverjir mikilvægustu og dásamlegustu viðburðir í lífi fólks. Ég vil meina að þetta geti líka verið skemmtilegar stundir með dass af húmor og legg mig alla fram við að búa til slíka merkisviðburði með öðrum. Ég er fædd árið 1985, stjórnmálafræðingur að mennt og alin upp í Hafnarfirði en bý nú í Vesturbæ Reykjavíkur. Síðustu ár hef ég starfað við dagskrárgerð í útvarpi og sjónvarpi á RÚV. Ég hef líka skrifað bækur og sjónvarpsþætti og er einlægur aðdáandi alls konar menningar. Mér finnst kaffi og trúnó mjög gott kombó og elska að skoða heiminn. Ég lauk námskeiði hjá Siðmennt í athafnastjórnun vorið 2018.

Sævar Freyr er fæddur 1962 og lauk námi í athafnarstjórnun haust 2013. Sævar er fjölskyldumaður og áhugamaður um heimspeki.

Margrét Harpa Guðsteinsdóttir er fædd árið 1977 og er bóndi á Lambhaga á Rangárvöllum. 

Athafnastjóri frá 2022

Inga nýtir skapandi samskiptahæfileika og ástríðu fyrir menningu til að leggja sitt á vogaskálarnar fyrir bættu samfélagi. Inga er vefhönnuður og Kaospilot og stundar jafnframt MPM-nám í verkefnastjórnun í HR. Inga tekur virkan þátt í stjórnmálum og skátastarfi og situr að auki í athafnaráði Siðmenntar. Athafnastjóri frá 2013 á höfuðborgarsvæði og nágrenni. Fædd 1986.Tungumál: íslenska, enska. Getur einnig fléttað eftirfarandi tungumálum inn í athöfn til móts við ensku: Hollenska, þýska, danska, norska, sænska.

Bragi Páll er fæddur 1984 og er rithöfundur og sjómaður, ættaður úr Breiðafirði. 

Athafnastjóri frá 2022

Fæddur 1983. Athafnarstjóri frá 2016.

Sigurður Rúnarsson er fæddur 1974 og hefur verið athafnarstjóri frá nóvember 2013 bæði á Íslandi og í Noregi hjá HEF systursamtökum Siðmenntar í Noregi Sigurður hefur stjórnað fjölmörgum nafnagjöfum á vegum Siðmenntar. Sigurður er sérfræðingur í upplýsingatækni og býr og starfar í Noregi en dvelst oft á Íslandi og sinnir athöfnum fyrir Siðmennt. Áður starfaði Sigurður í um 20 ár við útfaraþjónustu hjá Útfararþjónustunni við útfararstjórn. Sigurður hefur mikinn áhuga á tungumálum, sagnfræði og mannfræði.

Tungumál: 

Sigurður Hólm Gunnarsson er fæddur 1976 og hefur starfað í Siðmennt frá því fyrir aldamót og var formaður 2018-2019. Sigurður er iðjuþjálfi og starfar sem forstöðumaður á skammtímaheimili fyrir unglinga í Reykjavík. Sigurður er mikill áhugamaður maður um vísindi, heimspeki, stjórnmál og trúarbrögð og ver miklum tíma í að lesa sér til um þau efni. Sigurður hefur rekið vefritið Skodun.is frá því 1999 þar sem hann ritar hugleiðingar sínar reglulega. Tónlist spilar stórt hlutverk í tilverunni og þá aðallega þungarokk en líka öll falleg tónlist. Uppáhalds íslensku listamennirnir hans eru Svavar Knútur og Dimma. Sigurður er mikill fjölskyldumaður og býr með eiginkonu sinni, Ragnheiði Láru, ásamt þrem börnum, þeim Birgi Orra, Bjarti Hólm og Mána Hólm í Hafnarfirði. Svo sér hann líka um tvo ketti þá Lottu og Snúð sem í raun stjórna heimilinu eins dýrum af þessari tegund er einum lagið. Helstu fyrirmyndir hans í lífinu eru vísindafræðarinn Carl Sagan og mannvinurinn Thomas Paine sem sagði meðal annars: „Heimurinn er föðurland mitt og góðverk mín trúarbrögð“.

Þó léttleikinn sé alltaf mikilvægur eru stóru stundirnar í lífinu tækifæri til að vera einlæg og örlítið heimspekileg eitt stundarkorn. Gylfi er ísfirskur heilsuhagfræðingur. Athafnastjóri frá 2015. Býr á Ísafirði.

Hákon Guðröðarson, kallaður Hákon Hildibrand, er fæddur 1987 og er litríkur lífskúnstner sem geymir bónda í hjarta sér. Hákon er fæddur og uppalin Austfirðingur sem hélt út í heiminn og skilaði sér svo aftur í sveitina. Menntaður í hótel- og veitingarstjórnun frá Sviss, rekur Hildibrand Hótel og ýmiskonar tengda ferðaþjónustu í Neskaupstað ásamt því að sinna garðrækt og búrekstri. Hákon brennur fyrir menningu og nýsköpun á landsbyggðinni. Þegar hann er ekki að rækta garðinn sinn þá ræktar hann sína innri konu og er duglegur að koma fram í dragi. Hákon hefur verið athafnastjóri frá 2018 á Austurlandi.

Una Sighvatsdóttir er fædd árið 1985 og er sérfræðingur á skrifstofu forseta Íslands.

Athafnastjóri frá 2022

Matthías Tryggvi Haraldsson er fæddur árið 1994 og er tónlistarmaður

Athafnastjóri frá 2022 

Brynhildur Björnsdóttir er fædd árið 1970 og er fjölmiðlakona, söngkona, rithöfundur með brennandi áhuga á fólki, sögum og lífi. Hún er með fjórar háskólagráður: í bókmenntafræði, leiklist, söng og menningarfræði sem allar gagnast henni í lífinu. 

Athafnastjóri frá 2022

Hefur brennandi áhuga á því að efla unga einstaklinga til þátttöku í samfélagi og hjálpa þeim að ala með sér virðingu fyrir sjálfum sér og öðrum. Annars veit hann fátt betra en að eyða tíma með fjölskyldunni og elda góðan mat. Bæring er með meistaragráðu í kennslufræðum frá HÍ og starfar sem grunnskólakennari. Athafnarstjóri frá 2016 á Suðurlandi. Fæddur 1988.

Jóhann Björnsson er fæddur 1966 og hefur verið athafnastjóri frá 25. mars 2007. Jóhann var jafnframt formaður Siðmenntar frá febrúar 2015 og til júlí 2018. Menntun, störf og annað: BA og MA í heimspeki. Er með kennsluréttindi og hefur stundað kennslu í grunnskóla og í fullorðinsfræðslu undanfarin ár. Jóhann kenndi og var kennslustjóri á undirbúningsnámskeiðum fyrir borgaralega fermingu frá 1997-2020. Jóhann stýrði fyrstu giftingunni á vegum félagins.

Benedikt Sigurðarson er fæddur 1952. Hann er samfélagssinni sem elskar óspillta náttúru Íslands, ferðalög, leiklist og söng. Benedikt er með meistarapróf í stjórnun og stjórnsýslu, en er nú eftirlaunamaður.  Hann var lengi skólastjóri og háskólakennari og  framkvæmdastjóri Búfesti hsf.

Mörður (f. 1953) starfar sjálfstætt á ReykjavíkurAkademíunni við íslensk fræði, bókagerð og ýmiskonar textalestur. Hann er Reykvíkingur, vinstrimaður, alþjóðasinni, KR-ingur, áhugamaður um menningu og fræði forn og ný, umhverfissinni, gönguskíðamaður, femínisti og húmanisti. Hefur starfað við orðabókargerð, blaðamennsku og bókaritstjórn, verið aðstoðarmaður fjármálaráðherra og alþingismaður. Ritstjóri þriðju útgáfu Íslenskrar orðabókar, gefið út (einn og með öðrum) Grágás, Vídalínspostillu, Passíusálmana o.fl., skrifaði Málkróka um allskonar íslensku. Í námi í Reykjavík, Ósló og París, farið nokkuð um Evrópu og Miðausturlönd. Bjartsýnismaður af viljastyrk, yfirleitt í góðu skapi, ágætur ræðumaður og rithöfundur og vanur margskonar athöfnum. Ómannglöggur, stundum gleyminn og einsog fjarstaddur, en börnum finnst hann skrýtinn og skemmtilegur. Kvæntur Lindu Vilhjálmsdóttur ljóðskáldi, á þrjú afabörn, Hlín, Hafþór og Hörpu, og stuðningssoninn Þorgeir Örn. Sem sé: Þinn maður.

Inga er fædd árið 1992 í Reykjavík en bjó á Snæfellsnesi á unglingsárunum. Það er henni sannur heiður að fá að taka þátt í fagnaðartilefnum með fólki og hún hefur léttleika, húmor og einlægni að leiðarljósi í athöfnum sínum. Inga er með BA gráðu í heimspeki frá Háskóla Íslands og stundar nú meistaranám í þjóðfræði þar sem hennar helsta rannsóknarviðfang er samband mannfólks og dýra. Einnig starfar hún sem aðstoðarkona hjá NPA miðstöðinni. Hún lauk námskeiði í athafnarstjórnun árið 2016 og hefur auk þess kennt námskeið í fermingarfræðslu Siðmenntar.

Svanhvít Sjöfn Skjaldardóttir er fædd árið 1987 og er réttsýnn mannvinur, búsett á Patreksfirði. Hún hefur menntað sig á sviði félagsráðgjafar, kynjafræði og jákvæðrar sálfræði og er það ekki aðeins reynsla hennar af hinum ýmsu verkefnum sem nýtist henni við störf athafnarstjóra, heldur hefur hún einnig fallega sýn á lífið og er alltaf með bætt samfélag að leiðarljósi. 

Athafnastjóri frá 2022

Kristrún Ýr Einarsdóttir er fædd 1981 og hefur verið athafnastjóri síðan 2016. Villihjartað brennur heitt hjá Kristrúnu og henni finnst skemmtilegast að víkka sjóndeildarhringinn, prófa nýja hluti og læra af öðrum. Hún stundar nám í sálfræði við Háskólann á Akureyri. Pólitíska hjartað sveiflast fram og aftur en berst alltaf fyrir mannréttindum. Hún hefur lengst af starfað sem blómaskreytir og við ýmis svið ferðaþjónustunnar. Kristrún ferðaðist í eitt ár um asíu og eyjaálfu og hélt sig að mestu á ótroðnum slóðum, þar lærði hún að bros er sannarlega besta tungumálið og að mannréttindi eru alls ekki sjálfgefin. Kristrún telur að það sé gríðarlega mikilvægt að fólk njóti trúfrelsis sem og frelsis til að hafna trúarbrögðum. Mikilvægir atburðir í lífi fólks líkt og nafngjöf, ferming, hjónavígsla og útför eiga að geta tekið mið af þeim gildum sem fólk vill tileinka sér óháð hvaða trú eða lífsskoðun fólk aðhyllist, það er því hennar markmið með að starfa hjá Siðmennt að styðja við frelsi og val manneskjunnar um persónulega þjónustu þegar kemur að mikilvægum atburðum í lífi fólks.

Helgu finnst ómetanlegt að fá að taka þátt í mikilvægum tímamótum í lífi fólks. Hún leggur áherslu á hátíðlegar en jafnframt einlægar athafnir þar sem gleðin er í fyrirrúmi. Helga er fædd árið 1980 og er þjóðfræðingur og jógakennari. Hún er einnig með kennsluréttindi og hefur meðal annars sinnt kennslu á háskólastigi, starfað sem safnkennari og unnið við prófarkalestur og ritstörf. Undanfarin ár hefur hún verið með annan fótinn á Írlandi þar sem hún hefur stýrt ýmsum menningartengdum verkefnum, kennt jóga og starfað sem aukaleikkona í sjónvarpsþáttum.

Elías er kátur drengur sem nýtur þess að velta vöngum, eiga góðar samræður og stara á stjörnurnar. Hann dreymir um að fljúga, hefur gaman af því að ganga á fjöll og vera úti í náttúrunni og nýtur þess að gera stórar stundir í lífi annarra notalegar og eftirminnilegar. Elías er með BA gráðu í heimspeki og starfar sem landvörður. Athafnastjóri frá 2016 á höfuðborgarsvæði og nágrenni. Fæddur 1992.

Elísabet er sýningarstjóri og safnstjóri Listasafns ASÍ sem setur upp sýningar um land allt. Hún rekur einnig Gallerí Úthverfu / Outvert Art Space ásamt fleirum og alþjóðlegar gestavinnustofur ArtsIceland á Ísafirði. Hún stundaði háskólanám í Edinborg og París og hefur einnig búið og starfað í Noregi og Kanada. Hún gerðist athafnastjóri hjá Siðmennt til að hægt væri að bjóða upp á þennan valkost á Vestfjörðum, bæði fyrir heimafólk en líka fyrir ferðamenn sem koma hingað til lands í leit að ósnortinni náttúru og kyrrð. Vestfirðir hafa mikið að bjóða í þeim efnum. Elísabet hefur verið athafnastjóri síðan 2015.

Silja Jóhannesar Ástudóttir er fædd árið 1979 er verkefnastjóri og er búsett á Húsavík

Athafnastjóri frá 2022

Náttúrubarn og kærleiksbjörn sem sér húmorinn í litbrigðum lífsins. Bjarni er BFA í leiklist og MA í listkennslufræðum frá LHÍ. Hann er einnig BA í ensku frá HÍ. Bjarni vinnur jöfnum höndum á mörgum mismunandi stöðum við að kenna leiklist, leika, syngja og er stundum viðriðinn viðburðastjórnun. Athafnastjóri frá 2015 á höfuðborgarsvæði og nágrenni. Fæddur 1978.

Guðrún Vala er áhugasöm um lífið og tilveruna, en henni er best lýst sem félagslyndum einfara. Hún er alltaf að læra eitthvað og er með BA gráðu í mannfræði, B.Ed og M.Ed gráður og alls konar diplómur á framhaldsstigi s.s. í sérkennslu, náms- og starfsráðgjöf, hugrænni atferlismeðferð og fjölmenningu. Hún brennur fyrir réttlæti og málefnum innflytjenda auk þess að vera sílesandi. Fædd 1966 og gerðist athafnastjóri árið 2018. Starfar mest á Vesturlandi og stundum fyrir sunnan.

Lífsglaður líffræðingur, lærdómsfús og forvitin. Leggur mikið upp úr góðum samskiptum og vandar til allra verka. Brynja er líffræðingur að mennt og kennir raungreinar við Menntaskólann á Akureyri. Athafnarstjóri frá 2016 á Norðurlandi.